Strákasveitin ICEGUYS er búin að vera á miklu flugi upp á síðkastið en sveitin gaf út slagarann Gemmér Gemmér í sumar og gaf svo nýlega út plötuna 1918 sem hefur hlotið mikilla vinsælda. Þeir láta ekki slag standa þar en núna á miðnætti kom lagið Sexý Rú út. Rúrik Gíslason fer þar með einleik en lagið er í skemmtilegum country fíling sem hefur verið í mikilli uppsveiflu upp á síðkastið.
„ICEGUYS sería tvö er loksins að koma út og tengist lagið þáttunum beint. Þetta er skemmtileg viðbót við ICEGUYS-heiminn þó að ICEGUYS séu vissulega ekki flytjendur lagsins heldur tónlistarmaðurinn Sexy Ru. Lagið fléttast skemmtilega inn í fyrsta þátt án þess þó að gefa of mikið upp. Líkt og í seríu eitt þá skemmtum við okkur konunglega við gerð þáttanna þar sem við höldum áfram að hafa húmor fyrir sjálfum okkur að leiðarljósi. Ég hlakka mikið til að heyra viðbrögðin við laginu og þáttunum og vonandi náum við að fá fólk til að hlæja og hafa gaman af,“ segir Rúrik.
View this post on Instagram
Önnur þáttaröð kemur út sunnudaginn 24. nóvember og er mikil eftirvænting fyrir endurkomu þáttanna. Það má velta því fyrir sér hvort þetta lag segi okkur eitthvað um söguþráð þáttanna ef rýnt er í orð Rúriks um að lagið fléttist inn í fyrsta þátt.
„Það er alveg ótrúlega gaman að vera hluti af ICEGUYS-heiminum enda heill her af fólki sem vinnur saman í hinum fjölbreyttustu verkefnum. Að vera hluti af svona verkefni og ná að skapa heim tónlistar og sjónvarps, sem tala svona vel saman er einstakt. Okkar hlutverk er að vera með og styðja ICEGUYS alla leið, svo aðdáendur geti haldið áfram að njóta ICEGUYS,“ segir Ingólfur Norðdahl, markaðsdeild Símans.
