Auður Guðjónsdóttir, stofnandi og stjórnarformaður Mænuskaðastofnunar Íslands, hélt í gær erindi á fundi heilbrigðisnefndar Norðurlandaráðs undir heitinu: Læknum þá lömuðu. Í nefndinni sitja þingmenn frá öllum Norðurlöndum auk fulltrúa frá Álandseyjum.

Auður vakti athygli þingmannanna á yfirstandandi áratugi aðgerða ( 2022-2031) Alþjóðaheilbrigðismálastofnunarinnar WHO  í þágu flogaveiki og annarra meina í taugakerfinu. Hún sagði að WHO hafi í fyrstu einungis ætlað að hleypa af stokkunum átaki fyrir flogaveiki en vegna óþrjótandi vinnu Mænuskaðastofnunar Íslands, alþingismanna og embættismanna hafi tekist að koma öllu taugakerfinu inn í aðgerðaáætlun stofnunarinnar.

Til að fylgja málinu eftir frá Íslands hendi sagði Auður að Willum Þór Þórsson heilbrigðisráðherra hafi tilnefnt Katrínu Jakobsdóttur fyrrverandi forsætisráðherra sem sérstakan talsmann Íslands fyrir taugakerfisátakið á alþjóðavettvangi.

Auður bað þingmenn Norðurlandanna um að standa með Íslandi í þessum málum. Hún bað þá um að íhuga þann möguleika að Norðurlöndin byðu WHO að taka að sér það verkefni að skapa skilyrði fyrir læknavísindin og gervigreindarsérfræðinga til að greina og samkeyra þá vísindaþekkingu í taugakerfinu sem nú þegar er til staðar á heimsvísu. Hún taldi að ef lagt væri í slíka vinnu myndi koma í ljós mikil vannýtt vísindaþekking sem  myndi valda byltingu í að auka skilning læknavísindanna á því hvernig taugakerfið starfar.