Áætlanir um niðurrif sláturhússins í Brákarey í Borgarnesi eru komnar fram í byggðarráði Borgarbyggðar. Ekki er talið borga sig að halda húsinu við.

Mál húsanna í Brákarey voru mikið til umfjöllunar fyrir nokkrum árum síðan. En sveitarfélagið þurfti að úthýsa mörgum félögum sem höfðu þar aðstöðu eftir ábendingar frá slökkviliðsstjóra.

Þetta voru meðal annars golfklúbburinn, skotfélagið, fornbílafélagið og bifhjólafélgið á staðnum. Einnig voru ýmsir einstaklingar með aðstöðu þarna og voru margir óánægðir með hvernig bærinn hélt á málum.

Í byggðarráði voru lagðar fram þrjár sviðsmyndir um áfangaskiptingu niðurrifs hússins og var sveitarstjóra falið að gera kostnaðarmat á niðurrifi í samræmi við eina þeirra. Það er tillögu sem felur í sér niðurrif allra húshluta nema þremur burstum.

„M.v. ástand hússins er það slysagildra að óbreyttu, fráleitt er að endurnýja húsið og sá kostnaður sem nú fellur til við að halda hita- og rafmagni á húsinu er verulegur. Frá því starfsemi var hætt í húsinu hleypur sá kostnaður á tugum milljóna króna,“ segir í fundargerð.