SÍBS ætlar ekki að hætta að greiða út vinninga sína í inneignum hjá Hagkaupum eftir að netsala með áfengi hófst þar. Bera samtökin fyrir sig að ekki sé hægt að leysa út áfengi með vinningum. Kona sem hefur átt miða í hálfa öld telur orð framkvæmdastjóra innantóm og ætlar að segja upp miðanum.
„Ég og margir aðrir munum auðvitað hætta í þessu happdrætti. Mér var mjög annt um þetta og þykir þetta leitt,“ segir Hildur Helga Gísladóttir, starfsmaður Rauða krossins og fyrrverandi framkvæmdastjóri Kvenfélagasambands Íslands. „Ég er búin að vera með miða þarna síðan ég var ung. Ég og mín fjölskylda styðjum við góð málefni. Ég er alin upp þannig.“
SÍBS hefur það á stefnuskrá sinni að „að bæta heilsu og vellíðan landsmanna með endurhæfingu, forvörnum, jákvæðri íhlutun, fræðslu og vitundarvakningu um mikilvægi heilbrigðs lífsstíls.“ Vinningar í happdrætti SÍBS eru inneignarkort í Hagkaupum, 8.400 vinningar að heildarverðmæti 252 milljónir króna á ári. Í ljósi þess að Hagkaup hefur hafið netsölu með áfengi hefur yfirlýst stefna SÍBS verið dregin í efa.
Hildur sendi Guðmundi Löve, framkvæmdastjóra SÍBS, og Sveini Guðmundssyni, formanni, bréf og innti þá um svör hvort að viðskiptin við Hagkaup yrðu endurskoðuð.
Fékk hún þau svör að inneignarkortin væri ekki hægt að nota í áfengissölunni, sem heitir Hagar Wine B.V.. Sagði Guðmundur henni að þeir teldu að allt stefni í að allar helstu matvörukeðjurnar myndu bjóða áfengi nema lögum yrði breytt. Nú þegar væru það Heimkaup og Costco og óbeint Hagkaup, Bónus og fleiri fyrirtæki Haga.
Sagði hann að SÍBS væri að vinna að heilindum að mótvægisaðgerðum, það er spennandi verkefni á sviði hollustu sem tilkynnt yrði eftir áramót. Vinnigaskráin væri hins vegar fastákveðin af nefnd á vegum dómsmálaráðuneytisins og engu yrði breytt þar um.
Að mati Hildar eru þessi orð hins vegar innantóm. Það væri frekar aum afsökun að vínbúðin sjálf væri ekki formlega hluti af Hagkaupum og að aðrar verslanir væru líka að selja áfengi. Það skipti hana ekki höfuðmáli hvort hægt væri að nota inneignarkortin sjálf til að kaupa áfengi heldur stefna fyrirtækisins. „Hagkaup eru að rýra trúverðugleika sinn,“ segir Hildur.
Í samtali við DV segist Guðmundur Löve, sem situr í umræddri nefnd ráðherra, líta á það svo að Hagkaup og áfengisnetsalan séu tvær aðskildar verslanir.
„Það er ekki hægt að að nota inneignarkort Hagkaupa í áfengisversluninni. Við tryggjum það,“ segir hann.
Aðspurður segist Guðmundur ekki hafa rætt við Hagkaup um netsölu áfengis.
„Við styðjum eindregið takmarkað aðgengi að áfengi sem og öðrum óhollustuvörum,“ segir hann.
