Age Hareide, landsliðsþjálfari Íslands, ræddi við Stöð 2 Sport í kvöld eftir leik liðsins við Svartfjallaland.

Ísland vann flottan 2-0 heimasigur en þetta var fyrsti sigur okkar manna í sögu Þjóðadeildarinnar sem er ansi merkilegt.

Age var ánægður með frammistöðuna í heild sinni en hann hafði lofað stuðningsmönnum sigri fyrir viðureignina.

,,Það er alltaf gott að vinna, ég heyrði í gær þegar San Marino vann að við værum eina liðið sem hafði ekki unnið leik svo ég lofaði stuðningsmönnum fyrir leik að við myndum loksins vinna og sem betur fer gerðist það,“ sagði Age við Stöð 2 Sport.

,,Við vitum að úrslitin eru mikilvæg en þetta snýst um að ná hópnum saman, ég var mjög ánægður með frammistöðuna í heild sinni.“

,,Við ræddum við leikmennina fyrir leik, sumir höfðu glímt við meiðsli og sumir höfðu ekki spilað í dágóðan tíma, það er óþarfi fyrir okkur að taka áhættur. Þú þarft að byggja upp hóp sem getur spilað tvo leiki á stuttum tíma. Það er gott að vera með leikmenn sem geta komið inn og spilað vel.“

,,Við munum örugglega breyta miklu fyrir leikinn gegn Tyrkjum því við erum með marga varnarmenn sem eru klárir í slaginn en þessir varnarmenn stóðu sig vel. Vonandi gera þeir sem byrja í Tyrklandi það sama.“

Age var svo spurður út í Gylfa Þór Sigurðsson sem haltraði af velli eftir leik en hann fékk matareitrun að sögn Norðmannsins.

,,Nei hann er ekki meiddur, hann fékk matareitrun svo hann var í smá vandræðum eftir fyrri hálfleik og í þeim seinni.“