Kærunefnd vöru- og þjónustukaupa hefur úrskurðað í máli sem varðar kaup 16 ára drengs á sláttutraktor sem drengurinn greiddi hátt í hálfa milljón króna fyrir. Sláttutraktorinn var hins vegar aldrei afhentur og lagði móðir drengsins því fram kvörtun til nefndarinnar og krafðist endurgreiðslu.

Kvörtunin var lögð fram í febrúar síðastliðnum og var endurgreiðslu, alls 399.900 krónur, krafist. Aðilinn sem tók við pöntuninni og greiðslunni virti óskir nefndarinnar um andsvör og gögn að vettugi.

Í úrskurðinum kemur fram að drengurinn hafi pantað sláttutraktorinn sumarið 2023 og greitt fyrir hann með millifærslu á bankareikning hins ónefnda aðila, sem drengurinn lagði fram pöntunina hjá.

Upphaflega átti að afhenda sláttutraktorinn mánuði síðar en afhendingu var frestað um tvo mánuði. Síðan þá hefur ekkert náðst í aðilann sem seldi drengnum sláttutraktorinn og heldur ekki í eiganda fyrirtækisins. Af þessu má ráða að drengurinn hafi pantað sláttutraktorinn hjá fyrirtæki og lagt peningana inn á reikning þess en fyrirtækið er ekki nafngreint í úrskurðinum.

Þegar ekkert bólaði á sláttutraktornum krafðist móðir drengsins endurgreiðslu og riftun kaupanna á grundvelli laga um neytendakaup.

Í niðurstöðu nefndarinnar segir að þar sem söluaðilinn hafi ekki tekið til neinna varna verði að leggja það til grundvallar að hann hafi aldrei afhent vöruna sem hann tók greiðslu fyrir. Nefndin féllst því á það með móður drengsins að tilefni sé til að rifta kaupunum samkvæmt ákvæðum laga um neytendakaup og leggur það fyrir söluaðilann að endurgreiða sláttutraktorinn.

Hvort það muni nást í söluaðilann til að fá endurgreiðsluna á væntanlega eftir að koma í ljós.