KR er í mikilli brekku í Bestu deild karla. Eftir tap gegn HK í gær er liðið stigi fyrir ofan fallsvæðið þegar þrjár umferðir eru eftir af hefðbundnu tímabili. Rætt var um stöðu liðsins í Þungavigtinni og framtíð einhverra leikmanna.

KR var komið 0-2 yfir í gær en tapaði að lokum 3-2. Þetta var annar leikurinn þar sem Óskar Hrafn Þorvaldsson er aðalþjálfari liðsins og sömuleiðis annað tapið.

Töluvert meiri væntingar voru gerðar til KR-liðsins í vetur og miklum peningum varið í leikmenn. Sparkspekingurinn Kristján Óli Sigurðsson telur þó líklegt að Óskar muni losa sig við eitthvað af þeim fyrir næstu leiktíð.

„Þarna eru leikmenn sóttir fyrir tímabilið sem er ekki fræðilegur séns í helvíti að verði í liðinu hjá Óskari Hrafni á næsta ári,“ sagði Kristján í Þungavigtinni.

„Axel Óskar Andrésson, hann getur ekki spilað fótboltann sem Óskar vill spila. Hafsentarnirnir hans Óskars þurfa að geta spilað fótbolta.“

Þá telur Kristján sömuleiðis útilokað að markvörðurinn Guy Smit fái traustið frá Óskari á næstu leiktíð. „Hann ver ekki blöðru,“ sagði hann.

Kristján velti einnig fyrir sér framtíð Alex Þórs Haukssonar, sem var fenginn í KR úr atvinnumennsku fyrir tímabil.

„Alex Þór Hauksson er á varamannabekknum í gærkvöldi, kemur inn á í stöðunni 1-2 og leikurinn endar 3-2. Tilviljun? Ég veit það ekki.“

Ljóst er að Óskar á verk að vinna í Vesturbænum í vetur. Vonandi fyrir hans hönd og KR-inga verður hann að undirbúa lið sitt fyrir tímabil í deild þeirra bestu en ekki Lengjudeildinni.