Ása Ellerup og börn hennar, Christoper og Victoria, eru að reyna að púsla lífi sínu saman að nýju eftir að það hrundi kjölfar handtöku fjölskylduföðursins, Rex Heuermann, sem ákærður verið fyrir sex hrottaleg morð á kynlífsverkakonum. Ekki er útséð hvað ákærurnar verða margar því Heuermann er einnig efstur á lista grunaðra í sjöunda morðinu og til skoðunnar varðandi enn fleiri.
Þann 13. júlí síðastliðinn var eitt ár liðið frá handtöku Heuermann sem fór sem eldur um sinu um gjörvalla heimsbyggðina. Ekki síst á Íslandi enda með öllu fordæmalaust að Íslendingur sé svo nátengdur hrottalegum fjöldamorðingja.
Lögfræðingur fjölskyldunnar, Robert Macedonio, boðaði til blaðamannafundar fyrir framan heimili þeirra í tilefni af ársafmælinu. Sagði hann að fjölskyldan væri enn að sleikja sárin og að þau væru saklaus fórnarlömb í því fjölmiðlafári sem óhjákvæmilega fylgdi handtöku Heuermann og þeim hroðalegu glæpum sem hann er sakaður um. „Jafnvel þó að þessir atburðir áttu sér stað eða ekki, jafnvel þó hann sé saklaus eða sekur, þá hefur lífum þeirra verið kollvarpað. Enginn vill trúa því að fjölskyldumeðlimur, pabbi þeirra, bróðir eða eiginmaður geti framið slík myrkraverk“ sagði Macedonio í yfirlýsingu sinni.
Hann lagði þunga áherslu á að Ása og börn hennar hefðu ekkert með glæpi Heuermann að gera og þau hefðu djúpstæða samúð með ástvinum fórnarlambanna í málinu. Sagðist hann reikna með að allt að ár geti liðið þar til réttað verði yfir Heuermann vegna meintra glæpa hans en fjölskyldan hefði ákveðið að búa áfram á heimili sínu þar til stormurinn væri yfirstaðinn. Þá myndu þau hefjast handa við að halda áfram með líf sitt.
Eins og fram hefur komið var Ása gift Rex Heuermann í 27 ár en hún sótti um skilnað frá honum nokkru eftir handtöku hans. Hefur það vakið nokkra hneykslan að fjölskyldan hyggst koma fram í heimildarmynd um málið og má búast við því að fá fúlgur fjár fyrir. Lög í Bandaríkjunum kveða á um að glæpamönnum og fjölskyldum þeirra sé óheimilt að hagnast á myrkraverkum þeirra en skilnaðurinn breytir þeirri stöðu.
Á áðurnefndum blaðamannafundi héldu Ása og börnin sig til hlés en fram kemur að hún hafi neitað að svara spurningum um málið. Hins vegar tjáði hún sig um heilsu sína en fram hefur komið að Ása er að berjast á fleiri vígstöðum því hún greindist með krabbamein á dögunum og hefur sótt sér meðferðir vegna þess. Þær meðferðir hafa gengið vel en baráttan væri þó ekki búinn.
