Lögreglan í Suffolk í New York hefur nú til rannsóknar frásagnir 15 vændiskvenna sem gætu hafa átt í samskiptum við meinta raðmorðingjann, Rex Heuermann.

Fógetinn í Suffolk, Errol Toulon Jr. segir að þetta sé afrakstur umfangsmikillar rannsóknar þar sem skýrslur voru teknar af tæplega 300 vændiskonum.

Rex Heuermann starfaði sem arkitekt í New York þegar hann var handtekinn um hábjartan dag í júlí á síðasta ári. Síðan þá hefur hann verið ákærður fyrir morð sex kvenna sem allar höfðu starfað við vændi.

Þessar 15 frásagnir sem eru nú til nánari skoðunar þykja allar trúverðugar, en lögregla er ekki tilbúin að fara nánar í saumana á þessum frásögnum á þessum tíma.

Mál ákæruvaldsins gegn Heuermann verður næst tekið fyrir í dómsal þann 30. júlí. Um undirbúningsþinghald er að ræða þar sem ákæruvaldið og/eða verjendur leggja fram gögn og óska eftir þeim verði heimilað að kynna þau við aðalmeðferð.