Freddie Hahn kom sér í enska miðla í vikunni er hann sofnaði á leik Englands og Slóveníu. Hann segist hafa tekið meðvitaða ákvörðun um að leggja sig.

Hinn 32 ára gamli Hahn var staddur á leik sinna manna á EM en um var að ræða lokaleik C-riðils. Lauk honum með markalausu jafntefli og vann England riðil sinn á 5 stigum þrátt fyrir mjög ósannfærandi frammistöðu.

„Þetta var mjög leiðinlegur leikur. Það var ekki mikið í gangi svo ég ákvað að það væri betra fyrir mig að leggja mig. Það var baulað svo mikið í lokin að það vakti mig,“ sagði Hahn við Daily Mail.

„Mig var reyndar að dreyma að England hefði unnið keppnina en ég vaknaði við þá martröð sem frammistaða liðsins var. Ég hafði drukkið allan daginn og taldi betra að halla aftur augunum en að sjá þessa frammistöðu.“

Hahn segist þekktur á meðal vina sinna fyrir að leggja sig hér og þar.

„Ég myndi segja að það sé vegna þess hversu upptekinn ég er og því ég á ungt barn. Ég hef oft sofnað í partíum en aldrei á fullum knattspyrnuleikvangi.“