Fimmtán gámar féllu útbyrðis af Dettifossi, flutningaskipi Eimskip, í lok mars. Skipið laskaðist við þetta og gáma hefur rekið á fjörur á Suðurlandi.
Atvikið átti sér stað aðfaranótt 21. mars, austan við Vestmannaeyjar, þegar Dettifoss var að sigla frá Reykjavík til Reyðarfjarðar. En þangað fer skipið vanalega til þess að sækja fisk til útflutnings.
Að sögn heimildarmanns DV hafði gleymst að sjóbúa heilan „stakk“ af gámum, en stakkur er ein gámaröð. Veðrið var leiðinlegt, þó ekkert óveður, nógu slæmt var í sjóinn til þess að nokkrir stakkar af gámum færu af stað.
Enduðu alls fimmtán tómir gámar í sjónum með miklu bramli. Að sögn heimildarmanns kom gat á skipið vegna þessa.
Dettifoss er, ásamt Brúarfossi, stærsta flutningaskipið í íslenska fraktskipaflotanum. 180 metra langt og 31 metra breitt. Það var smíðað árið 2020 í Kína, sérhannað fyrir norðlægar aðstæður. Siglir það undir færeysku flaggi eins og önnur skip Eimskips. Dettifoss getur borið 2150 gámaeiningar.
„Því miður urðu mannleg mistök til þess að 15 tómir þurrgámar féllu í sjóinn af skipi félagsins á siglingu til Reyðarfjarðar þann 21. mars,“ segir Edda Rut Björnsdóttir, framkvæmdastjóri á mannauðs- og samskiptasviðs Eimskips. Segir hún tjónið á skipinu hafa verið minniháttar.
Heimildarmenn DV, sem starfa sem sjómenn, furða sig á því að hafa ekki heyrt neina tilkynningu um að hafa aðgát vegna gáma. En tómir gámar, sérstaklega nýlegir, gámar geti auðveldlega flotið og skapað stórhættu fyrir smábáta. Sumir gámana hefur rekið upp í fjörur á Suðurlandi.
Að sögn Eddu var Landhelgisgæslan samstundis upplýsti um atvikið. Ásgeir Erlendsson, upplýsingafulltrúi Landhelgisgæslunnar segir að tilkynning hafi verið send út.
„Áhöfn flutningaskipsins hafði samband við Landhelgisgæsluna að morgni 21. mars og tilkynnti að skipið hefði misst um það bil fimmtán gáma í sjóinn út af Meðallandsbugt,“ segir Ásgeir. „Áhöfnin á TF-GRO var á sama tíma að undirbúa æfingarflug og var ákveðið að þyrlan færi yfir svæðið og kannaði hvort einhverjir gámar sæjust á floti. Rétt austan við Vestmannaeyjar kom áhöfn þyrlunnar auga á einn gám á floti í sjónum. Landhelgisgæslan útbjó siglingaviðvörun til sjófarenda vegna málsins sem send var með Navtex og var einnig lesin á VHF.“
Gámar hafa áður fyrr farið í sjóinn. Til dæmis missti eldri Dettifoss nokkra gáma í sjóinn norðvestur af Færeyjum árið 2014 í aftakaveðri. Þetta er þó ekki algengt.
„Sem betur fer kemur það örsjaldan fyrir að gámar fari í sjóinn en félagið hefur í kjölfarið farið vel yfir málið og verkferla til að koma í veg fyrir að slíkt gerist aftur,“ segir Edda.
