Byrjað er að selja bréfpoka undir lífrænt sorp í Bónus. Pokarnir voru áður gefnir í stórmörkuðum en nú er einungis hægt að nálgast þá ókeypis í endurvinnslustöðvum Sorpu og í nytjaversluninni Góði hirðirinn.
Að sögn Gunnars Dofra Ólafssonar, samskipta og þróunarstjóra Sorpu, er það ekki Sorpa sem selur Bónus pokana heldur verður Bónus sér út um þá sjálft. Gunnar gerir þó ráð fyrir að þeir séu að fullu sambærilegir við þá sem Sorpa gerir kröfu um að fólk á höfuðborgarsvæðinu noti undir lífrænan úrgang.
Búntið af pokunum kostar 559 krónur í Bónus. 40 stykki eru í búntinu, sem gerir 14 krónur á poka.
Ekki er að sjá að Krónan eða Nettó séu byrjuð að selja poka sem þessa. Að minnsta kosti er þá ekki að finna á heimasíðum viðkomandi netverslana.
Forsvarsmenn Sorpu greindu frá því í janúar síðastliðnum að dreifingunni yrði breytt. En þá höfðu borist fregnir af því að fólk væri að hamstra poka í miklum mæli, 24 milljónir í heildina. Sumt fólk væri búið að koma sér upp margra ára birgðum af pokum sem var dreift ókeypis í stórmörkuðum.
Að sögn forsvarsmanna Sorpu kom þessi hömstrun Íslendinga þeim í opna skjöldu enda hafði sambærileg dreifing gengið mun betur í öðrum löndum. Var nýja kerfið tekið upp vegna gríðarlegs kostnaðar sem fallið hefur á Sorpu, 240 milljónir króna.
