Ólafur Ragnar Grímsson, fyrrverandi forseti Íslands, kennir tvöföldu siðgæði Evrópuríkja um að deilan á milli Armeníu og Aserbaídsjan hafi verið óleyst í mörg ár. Hann sagði Aserbaídsjan hafa endurheimt fullveldi sitt með því að vinna sjálfstætt.

Þetta sagði Ólafur á ráðstefnu í Bakú, höfuðborg Aserbaídsjan, í vikunni, XI Global Baku Forum. Þarlend fréttastofa, Trend News Agency, greinir frá þessu.

„Vegna hins tvöfalda siðgæðis Evrópu, var hin langvinna deila á milli Aserbaídsjan og Armeníu óleyst um margra ára skeið,“ sagði Ólafur. „Þrátt fyrir áralangar samningaviðræður í gegnum margvíslegar leiðir varð enginn framgangur í málinu. Skorturinn á haldbærri niðurstöðu úr þessum samtölum undirstrikar misbresti Sameinuðu þjóðanna. Þetta skapar vitræna áskorun og spyr gagnrýnna spurninga um siðferði heimsins sem við höfum byggt.“

Deilan sem um er rætt er um Nagornó-Karabakh, svæði sem Armenar bjuggu á og stjórnuðu þrátt fyrir að vera almennt viðurkenndur hluti af Aserbaídsjan. Rússar héldu hlífiskildi yfir Armenum og voru með friðargæslulið á svæðinu. En vegna þess að Rússar gátu ekki barist á tveimur vígstöðvum létu Aserar til skarar skríða í haust og tóku svæðið með hervaldi. Allir Armenar fluttu í kjölfarið af svæðinu.