Óhugnaleg hnífaárás átti sér stað um fjögurleytið í gær í verslun OK Market á horni Hlíðarfót­ar og Hauka­hlíðar í Vals­hverf­inu svokallaða. Árásarmaðurinn, sem er góðkunningi lögreglunnar, var handtekinn skömmu eftir árásina en starfsmennirnir tveir voru fluttir á slysadeild til aðhlynningar. Áverkar þeirra reyndust blessunarlega ekki vera alvarlegir.

DV hefur undir höndum myndband úr öryggismyndavél verslunarinnar þar sem hildurleikurinn sést glöggt. Þar má sjá árásarmanninn ganga inn í versluna og taka starfsmennina tvo tali sem standa fyrir aftan afgreiðslukassann. Samræðurnar virðast rólegar og ekki að sjá að starfsmönnunum standi nein ógn af gestinum.

Árásarmaðurinn virðist svo ætla að ganga áfram inn í verslunina en þá dregur hann skyndilega upp hníf úr vasa sínum og ræðst fyrirvaralaust á starfsmennina tvo. Eftir stutt átök ná starfsmennirnir að komast undan og hlaupa úr augsýn inn í verslunina. Árásarmaðurinn virðist þá íhuga að veita þeim eftirför en ákveður síðan að ganga hröðum skrefum út úr versluninni. Atburðarásin er hröð en alls líða 40 sekúndur frá því að árásarmaðurinn kemur inn í verslunina og þar til að árásin er yfirstaðin.

Árásarmaðurinn er samkvæmt heimildum DV af erlendu bergi brotinn.  Í umfjöllun Mbl.is um árásina kemur fram að hann eigi sér langa afbrotasögu hérlendis. Hann hefur verið dæmdur í fangelsi fyrir skjalafals og sakfelldur fyrir fjölmörg brot þar á meðal vald­stjórn­ar­brot, brot gegn nálg­un­ar­banni, lík­ams­árás, hús­brot og brot gegn sótt­varna­lög­um.