Í byrjun vikunnar staðfesti Landsréttur gæsluvarðhaldsúrskurð yfir erlendum manni sem hefur ítrekað komið til landsins þrátt fyrir að hafa verið vísað jafnharðan frá því. Maðurinn hefur notað fjögur mismunandi eftirnöfn og er raunar í endurkomubanni á öllu Schengensvæðinu.
Nánar er greint frá málsatvikum í úrskurði Héraðsdóms Reykjaness sem fylgir með úrskurði Landsréttar. Þar kemur kemur fram að maðurinn kom til landsins 28. febrúar síðastliðinn. Tollgæslan og lögreglan höfðu afskipti af honum þar sem grunur lék á að hann uppfyllti ekki skilyrði til að koma inn í landið. Maðurinn gaf upp nafn og framvísaði gildu vegabréfi. Í því mátti sjá innstimplun inn á Schengensvæðið í Ungverjalandi, 1o dögum áður. Sagðist maðurinn vera kominn til landsins sem ferðamaður ásamt eiginkonu sinni.
Í úrskurðinum segir að maðurinn hafi ítrekað komið til landsins og notast við þrjú mismundandi eftirnöfn og í þetta skiptið hafi hann notað enn eitt nafnið. Honum var flett upp í lögreglukerfinu og komu þá í ljós ítrekuð afskipti af honum hér á landi og þar að auki að hann væri í endurkomubanni á Schengensvæðinu frá 2019 til 2025. Við uppflettingu í kerfum Schengen kom í ljós að hann væri í raun í tvöföldu endurkomubanni en hitt bannið gildir til 2026.
Nýja eftirnafnið sagðist maðurinn hafa tekið upp þegar hann giftist eiginkonu sinni í febrúar á þessu ári.
Eftir að allt þetta kom í ljós var manninum birt hugsanleg brottvísun frá landinu og var máli hans vísað til Útelendingastofnunar til ákvörðunar. Manninum hefur áður verið vísað frá landinu.
Embætti Lögreglustjórans á Suðurnesjum færir rök fyrir kröfu sinni um að maðurinn sæti gæsluvarðhaldi meðal annars með því að hegðun hans gefi til kynna að hann ógni allsherjarreglu, öryggi ríkisins og almannahagsmunum.
Í niðurstöðu Héraðsdóms Reykjaness segir ennfremur að manninum hafi áður verið vísað úr landi þar sem hann hafi talist vera ógn við almannahagsmuni.
Maðurinn skal sæta gæsluvarðhaldi fram til 14. mars næstkomandi.
