Aðalmeðferð í hryðjuverkamálinu svokallaða lauk í dag og vænta má dóms eftir fjórar vikur. Sindri Snær Birgisson er ákærður fyrir tilraun til hryðjuverka og félagi hans, Ísidór Nathansson, er ákærður fyrir hlutdeild í tilraun til hryðjuverka. Eins og margoft hefur komið fram byggir málið gegn þeim tvímenningum að mjög miklu leyti á skilaboðaspjalli þeirra þar sem þeir viðruðu áhuga á ýmsum ofbeldisverkum í bland við annað spjall. Tekist hefur verið á um hvort þeim félögum hafi verið alvara eða hvort um hafi verið að ræða ósmekklegt grín.

Sjá einnig: Héraðssaksóknari segir að dómari eigi að ákveða refsingu

Verjandi Sindra, Sveinn Andri Sveinsson, sem flutti mál hans síðdegis í dag, sagði í stuttu spjalli við DV í kvöld að hann teldi aðalmeðferðina hafa í heild gengið vel. Hann sakar ákæruvaldið um rangfærslur og lýsir von um að dómurinn víki ekki frá lögfræðilegum staðreyndum:

„Í heildina gekk aðalmeðferðin vel. Reyndar vakti það athygli að ákærðu nutu ekki að nokkru leyti sannmælis hjá ákæruvaldinu þrátt fyrir að það eigi að vera hlutlaust. Allt var lagt þeim út á verri veg; ummæli þeirra klippt til og eða tekin úr öllu samhengi og þvaður á netinu sagt undirbúningur hryðjuverks. Síðan gaf hreinlega að líta vísvitandi rangfærslur í ákæru auk þess sem í ákæru og málflutningi ákæruvalds voru á köflum stórfelldar ýkjur.“

Sveinn segir að skilyrði fyrir tilraun til hryðjuverka í tilfelli Sindra og til hludeildar í tilrauninni hjá Ísidór séu ekki til staðar:

„Þegar upp er staðið og moldviðrið sest kemur á daginn að skilyrði refsiverðrar tilraunar er ekki til staðar hjá Sindra og enn síður refsiverð hlutdeild hjá Ísidór. Ég vona að dómurinn haldi sig við þá lögfræðilegu staðreynd.“