Íbúar í miðbæ Hafnarfjarðar tóku eftir því fyrir skemmstu að búið var að fjarlægja hina svokölluðu Hjartasteina sem stóðu fyrir framan Bæjarbíó. Í staðinn voru komnir venjulegir hellusteinar.
„Við erum aðeins að breyta þeim. Það koma nýir niður á sama stað,“ segir Páll Eyjólfsson, framkvæmdastjóri Bæjarbíós.
Þrír hafnfirskir listamenn hafa fengið sinn Hjartastein. Tónlistarmaðurinn Björgvin Halldórsson, rithöfundurinn Guðrún Helgadóttir sem er nú látin og grínistinn Þórhallur Sigurðsson, Laddi.
Þetta er ekki í fyrsta skiptið sem steinn Björgvins er fjarlægður. Upphaflega var hann stjarna, byggð á The Walk of Fame í Hollywood, en eftir að viðskiptaráð kvikmyndaborgarinnar kvartaði árið 2019 var steininum breytt í Hjartastein. Guðrún og Laddi fengu sína steina í kjölfarið.
Páll er dularfullur um breytingarnar sem gerðar verða á steinunum og vill ekkert segja. Þá er ekki vitað nákvæmlega hvenær þeir verða settir niður.
„Það er ekki alveg öruggt. Þegar fer aðeins að birta,“ segir Páll.
Árdís Ármannsdóttir, sviðsstjóri Þjónustu- og þróunarsviðs Hafnarfjarðarbæjar, segir að Hjartasteinarnir séu væntanlegir fljótlega. „Þessir sem voru fyrir þóttu helst til hálir undir ákveðnum kringumstæðum og því var ákveðið að skipta þeim út,“ segir hún.
Ljóst er að mikið götupláss þarf fyrir alla þá hafnfirsku listamenn sem eiga eftir að fá sinn Hjartastein í framtíðinni. Dugar að nefna til dæmis Hildi Guðnadóttur, Jóhönnu Guðrúnu, Friðrik Dór og Jón Jónsson, Botnleðju, Jet Black Joe, Svölu og Krumma, Sigurð Sigurjónsson, Björk Jakobsdóttur og Björn Thoroddsen.
