Í upphafi vikunnar var sagt frá því að Breiðablik hefði boðið í Aron Jóhannsson, leikmann Vals. Tilboðinu var hafnað en í kjölfarið fór af stað umræða um að Aron væri ósáttur á Hlíðarenda.

Það var Hjörvar Hafliðason sem greindi fyrstur frá tilboðinu og í hlaðvarpi hans, Dr. Football, var í gær rætt um ósætti Arons. Rætt var um að samstarf hans og Arnars Grétarssonar þjálfara gengi ekki vel og að jafnvel væri vilji innan Vals til að losa hann.

Þetta var einnig tekið fyrir í Þungavigtinni en þáttastjórnandinn Ríkharð Óskar Guðnason sagðist þar hafa tekið púlsinn á Völsurum.

„Ég fór á stúfana í dag og heyrði í góðum mönnum á Hlíðarenda. Þar fékk ég beint í andlitið að þetta væri eintómt þvaður frá A-Ö,“ sagði hann og hélt áfram.

„Mér var líka sagt að eftir að við byrjuðum með þessi podcöst virtist sem svo að það væri hægt að segja allan andskotann og komast upp með það.“

Kristján Óli Sigurðsson tók til máls.

„Ég held að menn ættu að fylgjast aðeins með og ekki bara vera að bulla og rugla um það sem þú heyrir frá Jóni eða Séra Jóni.“

Mikael Nikulásson var að vanda með þeim félögum í setti en hann telur fréttirnar af Aroni ekki úr lausu lofti gripnar.

„Það er eitthvað til í að hann hefði áhuga á að fara í Breiðablik. Það er bara mín tilfinning,“ sagði hann.