Í liðinni viku fór fram fundur bæjarráðs Vestmanneyja. Meðal fundarefna var fjöldi formlegra fyrirspurna sem bárust bænum á árinu 2023. Í fundargerð fundarins kemur fram að fjöldi þeirra skagaði hátt upp í fjölda daga ársins og þær bárust allar frá einum og sama einstaklingnum.

Í fundargerðinni kemur fram að fjöldi formlegra fyrirspurna til Vestmannaeyjabæjar sem varðað hafi hin ýmsu mál sveitarfélagsins og félags í eigu þess hafi verið 348 á árinu 2023. Þær hafi allar borist frá einum einstaklingi.

Sá tími sem hafi farið í að svara fyrirspurnunum jafngildi um það bil hálfu stöðugildi starfsmanns allt árið 2023.

Efni fyrirspurnanna er ekki sundurliðað í fundargerðinni og því kemur ekki fram hvað viðkomandi hafði mestan áhuga á að vita um starfsemi bæjarins og félagsins í eigu hans. Það er ekki tekið beinlínis fram um hvaða félag er að ræða en telja verður líklegt að fyrirspurnirnar hafi snúist um Herjólf ohf. sem sér um rekstur samnefndrar ferju og er í eigu Vestmannaeyjabæjar.