Í tilkynningu frá Matvælastofnun kemur fram að Óvenju margar ábendingar hafi að undanförnu borist stofnuninni um dauða auðnutittlinga, hvaðanæva af landinu frá fólki sem fóðri smáfugla reglulega. Matvælastofnun muni á næstunni reyna að komast að því hvað veldur þessu.

Um auðnutittlinga segir í tilkynningunni að þeir séu lítill finkufugl og sé staðfuglar á Íslandi. Auðnutittlingur sé frææta og byggi tilveru sína á birkifræi og leiti sér ætis í trjám og öðrum gróðri. Kjörlendi auðnutittlinga sé birkiskógar og kjarr, auk þess ræktað skóglendi og garðar. Þeir séu algengir á fóðurbrettum þar sem fræ séu gefin og sé sólblómafræ eitt besta fóðrið fyrir þá. Þeir séu þó ekki eins háðir fóðrun og margir aðrir smáfuglar og flytji sig oft á milli svæða eftir veðri og fæðisframboði.

Í tilkynningunni segir enn fremur að ábendingarnar sem hafi borist Matvælastofnun snúi oftast að einstaka eða fáum fuglum sem sýni veikindaeinkenni og drepist að því er virðist á 2-3 dögum. Ekki hafi verið sýnt fram á fjöldadauða auðnutittlinga en sumir sem fóðri smáfugla upplýsi að auðnutittlingar séu hættir að koma á fóðurstöðvar. Skýring á því geti einnig verið að fuglarnir hafi flutt sig á milli svæða, en tilkynningar um veika og dauða fugla séu þó óvanalega margar.

Matvælastofnun muni á næstunni fá hræ af fuglum af mismunandi landsvæðum og senda í sýnatökur og krufningu að Tilraunastöð Háskólans í meinafræði að Keldum til að komast nær því að greina mögulegar ástæður fyrir þessum veikindum og dauða. Jafnframt verði reynt að komast að hvort sömu ástæður liggi að baki í öllum tilvikum. Samkvæmt upplýsingum dýrafræðinga við Háskóla Íslands hafi álíka tilvik komið upp á Íslandi áður á síðustu árum, en þó ekki í slíku umfangi. Ekki hafi áður verið kannað sérstaklega hvað valdi þessum afföllum.

Sérstaklega er tekið fram að mögulegt sé að fugladauðinn kunni að tengjast sýkingum sem geti komið upp við fóðurstöðvar. Matvælastofnun hvetji því fólk sem fóðrar smáfugla til að gæta fyllsta hreinlætis og dreifa fóðri sem mest á fleiri staði. Það minnki einnig streitu hjá fuglunum að hafa fóðurstöðvar dreifðar.