Saksóknari í máli Eddu Bjarkar Arnardóttur sem var framseld til Noregs á dögunum fer fram á sautján mánaða fangelsi yfir henni.

Edda flaug frá Noregi til Íslands í mars 2022 með þrjá syni sína en hún hefur átt í harðri forræðisdeilu við barnsföður sinn.

Morgunblaðið greindi frá því í gærkvöldi að saksóknari hefði farið fram á 17 mánaða dóm yfir Eddu, en blaðamaður þess sat aðalmeðferð málsins fyrir Héraðsdómi Telemark í Skien.

„Ákærða vissi að hún væri að brjóta af sér þegar hún náði í börn­in, það hef­ur hún viður­kennt, og hún hef­ur enn frem­ur gerst sek um al­var­lega van­rækslu barn­anna,“ hefur Morgunblaðið eftir Lise Dal­haug sak­sókn­ara þegar hún hélt lokaræðu sína í gær.

Þá sagði Lise að ekki væri erfitt að gera sér í hugarlund hversu þungbært málið hefði verið föður drengjanna sem hefði enga hugmynd um hvar þeir væru niðurkomnir.

„[Ákærða] seg­ir að allt gangi svo vel á Íslandi og börn­un­um gangi vel í skól­an­um. Hún dreg­ur upp glans­mynd sem stenst ekki,“ sagði sak­sókn­ari samkvæmt frétt Morgunblaðsins.