Þorgrímur Þráinsson rithöfundur segir að hugsa þurfi í lausnum eftir að niðurstöður PISA könnunar fyrir 2022 voru birtar í gær, en könnunin mælir hæfni 15 ára nemenda í lesskilningi, læsi á náttúruvísindi og læsi á stærðfræði.
Sjá einnig: Sjáðu sláandi niðurstöður PISA-könnunarinnar – Ísland eftirbátur annarra þjóða
„Núna þarf að hugsa í LAUSNUM í stað þess að kenna hvert öðru um hversu illa sumir krakkar eru staddir í lesskilningi. Mitt framlag á þessu augnabliki er að gefa börnum SÖGU sem þau geta sjálf myndskreytt. Slíkt er þroskandi og getur kveikt frekari áhuga á sögum, lestri og myndskreytingu – listsköpun!,“ segir Þorgrímur í færslu á Facebook.
„Ég á sögu sem heitir SNÚLLI SNIGILL og hún kemur líklega aldrei út á bók. Sagan er á pdf-skjali, texti á hálfri síðu og hálf síða til að myndskreyta. Alls 20 blaðsíður. Ég er nokkuð viss um að börn upp að átta ára aldri, læs eða ólæs, geta haft gaman af sögunni. Um 40 skáletruð orð eru í sögunni en þau þarf líklega að útskýra fyrir börnunum. Þá bæta þau 40 orðum við orðaforðann. Þið ykkar sem viljið fá söguna senda getið sent mér skilaboð á andi@andi.is eða hér á Facebook. Sagan er gjöf til ykkar.“
