Ný samningur Handknattleikssamband Íslands og laxeldisfyrirtækisins Arnarlax, hefur vakið upp hörð viðbrögð hjá netverjum. En fyrirtækið verður einn af bakhjörlum landsliðanna og verða treyjurnar merktar því.
Eins og DV greindi frá í gær var Guðmundur Guðmundsson, fyrrverandi landsliðsþjálfari, ekki sáttur við samninginn og sagði hann regin hneyksli sem sýndi stórkostlegan dómgreindarskort Guðmundar B. Ólafssonar, formanns HSÍ.
Fleiri hafa tekið undir þessi orð Guðmundar en nokkrir koma þó samningnum til varnar.
„Það er mikið fagnaðarefni fyrir HSÍ þegar við skrifum undir samstarfssamninga við nýja bakhjarla. Flestir bakhjarlar HSÍ í dag hafa verið í bakvarðasveit okkar í yfir áratugi, það er von okkar hjá HSÍ að samstarfið við Arnarlax verði farsælt og ánægjulegt“ sagði formaðurinn í tilkynningu sem sett var inn á Facebook.
Þegar þetta er skrifað hefur færslan uppskorið 78 reiðikalla, 26 grátkalla en aðeins 41 þumla.
„Vanhugsað“, „veruleikafirrt samband“, „gjörsamlega til skammar“, „sorglegt“, „HSÍ til skammar“, „dómgreindarleysi“, „óhæf stjórn HSÍ“ eru á meðal athugasemdanna við færsluna sem flestar ef ekki allar eru mjög neikvæðar. Meðal annars er skorað á landsliðsmenn að gefa ekki kost á sér vegna samningsins.
Vísað er til frétta um lúsétinn lax og umhverfissóðaskap sem tengist sjókvíaeldinu, sem eins og ný könnun gefur til kynna nýtur afskaplega lítils stuðnings á Íslandi. Eða innan við 10 prósent landsmanna.
Margir hafa líka lýst vanþóknun sinni á samfélagsmiðlum um þennan samning. Meðal annars tvær konur sem hafa látið í sér heyra í náttúrverndarmálum.
„Hversu aumkunarvert spons er hægt að láta yfir sig ganga?“ spyr Katrín Oddsdóttir, lögmaður Náttúruverndarsamtaka Íslands og merkir HSÍ í færslunni.
„Ég sem hef alltaf haft svo mikla trú á HSÍ. Þetta er skelfilegt að vita. Gera menn í alvöru allt fyrir peninga?“ spyr Inga Lind Karlsdóttir, fjölmiðlakona og stjórnarmaður í Íslenska náttúruverndarsjóðnum.
Varnir fyrir samninginn koma aðallega frá Vestfirðingum, þar sem Arnarlax og fleiri sjókvíaeldisfyrirtæki eru staðsett.
„Vestfirskt fyrirtæki orðið bakhjarl HSÍ. Laxeldið er öflug atvinnugrein,“ segir Kristinn H. Gunnarsson, ritstjóri vestfirska miðilsins Bæjarins besta og fyrrverandi þingmaður. En hann hefur skrifað margar greinar til stuðnings laxeldis.
„Hversu flott er það að öflugt fyrirtæki á Bíldudal sé að styðja svona vel við landsliðið í handbolta. Alveg til fyrirmyndar,“ segir Hafdís Gunnarsdóttir, fyrrverandi varaþingmaður og bæjarfulltrúi Sjálfstæðisflokksins á Ísafirði.
Við báðar þessar færslur setur Einar K. Guðfinnsson þumal, fyrrverandi sjávarútvegs og landbúnaðarráðherra Sjálfstæðisflokksins, sem varð formaður Landssambands fiskeldisstöðva eftir að þingferlinum lauk.
