Björn Ingi Hrafnsson, fyrrverandi borgarfulltrúi Framsóknarflokksins og fjölmiðlamaður, eygir nú sæti á Alþingi í næstu kosningum. Ekki fyrir sinn gamla flokk heldur Miðflokkinn.

„Þetta er málið með fyrrverandi stjórnmálamenn. Þeir geta alltaf snúið aftur…“ sagði Björn Ingi nýverið í færslu á samfélagsmiðlum. Tilefnið var að David Cameron, fyrrverandi forsætisráðherra Bretlands, væri að snúa óvænt aftur sem utanríkisráðherra í ráðherrauppstokkun þar í landi.

Augljóst er að Björn Ingi var ekki aðeins að varpa ljósi á vendingar í alþjóðastjórnmálum heldur sá fræjum innanlands. Það er að hann sjálfur sé núna að íhuga framboð til næstu Alþingiskosninga.

Miðflokkurinn rís á ný

Björn Ingi var áberandi í kringum stofnun Miðflokksins. Árið 2017 stofnaði hann framboð en fljótlega var tilkynnt að það myndi sameinast nýju framboði Sigmundar Davíðs Gunnlaugssonar, sem hafði verið utangarðs í Framsóknarflokknum í nokkurn tíma eftir Wintris málið. Kom það nokkuð á óvart að Björn Ingi hafi ekki verið í framboði fyrir Miðflokkinn í kosningunum það ár.

Miðflokkurinn var í kjallaranum í síðustu kosningum eftir Klaustursmálið og fékk aðeins þrjá menn kjörna. Einn af þeim flúði skipið strax og bjuggust margir við því að flokkurinn myndi þurrkast út. Í sveitarstjórnarkosningunum árið eftir þurrkaðist flokkurinn út á höfuðborgarsvæðinu en rétt hékk inni sums staðar á landsbyggðinni. Grindavík var eini sigurinn.

Nú viðrar hins vegar mun betur fyrir Miðflokkinn sem hefur verið að mælast í 8 og 9 prósentustigum og er orðinn stærri en Framsóknarflokkurinn sem vann risasigur í tveimur síðustu kosningum.

Fyrir Miðflokkinn myndi þetta þýða 5 eða 6 þingsæti hið minnsta, en eins og aðrir íhaldssamir landsbyggðaflokkar fær flokkurinn yfirleitt meira fylgi í kosningum en könnunum.

Í sviðsljósinu

Auðvelt er að sjá fyrir sér að Björn Ingi leiði annað hvort Reykjavíkurkjördæmið, þar sem þó verður erfiðast fyrir flokkinn að ná inn manni. Björn Ingi hefur reynslu í kosningabaráttu í Reykjavík og myndi beina atgeir sínum að Samfylkingu og Framsóknarflokki sem leiða borgarstjórnina.

Eftir nokkuð langt skeið frá sviðsljósinu hefur Björn Ingi haldið sér kyrfilega í því undanfarna mánuði. Viljinn er vaknaður með krafti og það líður varla sú vika þar sem Björn Ingi er ekki mættur í útvarpsviðtal til þess að spá ríkisstjórninni falli. Það myndi henta honum ljómandi vel.