„Það eru tveir staðir þar sem sólin aldrei skín og þetta er annar þeirra. Hverjum datt í hug að fjarlægja bílastæðin og gera útivistarsvæði sem aldrei er eða verður nokkurri manneskju til gleði eða ánægju,“ spurði Tommi og birti mynd af svæðinu fyrir framan Tollhúsið í Tryggvagötu þar sem áður voru bílastæði.
Í stað bílastæða er búið að koma fyrir stórri göngugötu sem býður upp á ýmsa möguleika fyrir gangandi vegfarendur. Var markmið framkvæmdanna að gera borgina mannvænni, fallegri og aðgengilegri fyrir virka ferðamáta.
Margir hafa fagnað þessum breytingum en á sama tíma virðast einhverjir sakna bílastæðanna við Tollhúsið og er Tommi augljóslega einn þeirra. Hafa sumir bent á að íslenskt veðurfar bjóði ekki upp marga daga af útiveru og telja að þarna verði sjaldan full gata af fólki.
Færsla Tómasar fór öfugt ofan í notendur X sem gagnrýndu Tómas fyrir gamaldags viðhorf.
Jón Gnarr, fyrrverandi borgarstjóri, sló á létta strengi og sagði: „Ömurlegt með bílastæðin, á svo margar góðar minningar sem er búið að skemma.“
Hildur Sverrisdóttir, þingflokksformaður Sjálfstæðisflokksins, birti mynd af sér sem var tekin í góðu veðri á torginu og sagði: „Til dæmis mér datt það í hug. Sé ekki eftir neinu.“
„Mjög vel heppnaðar breytingar. Hef notið sólar og mannlífs þarna nokkrum sinnum,“ sagði almannatengillinn Andrés Jónsson.
Einn hvatti Tomma til að eyða færslunni. „Kannski því þarna rétt hjà er langstærsti bílastæðakjallari landsins og ég hef skokkað þessa götu nánast vikulega, þarna er oftar en ekki útisvæði sem er manneskjum til gleði og ánægju. Myndi eyða þessari færslu.“
Annar sagði: „Ég fer þarna um oft á dag og þetta svæði er búið að vera kjaftfullt í allt sumar. Vandræðaleg færsla.“
Það eru tveir staðir þar sem sólin aldrei skín og þetta er annar þeirra. Hverjum datt i hug að fjarlæja bílastæðin og gera útivistarsvæði sem aldrei er eða verður nokkruri manneskju til gleði eða ánægju pic.twitter.com/QIISoA8eE2
— Tómas A Tómasson (@a_tomasson) November 9, 2023
