Lögreglan á höfuðborgarsvæðinu hefur sent frá sér yfirlýsingu í tengslum við aðgerðir í gærkvöld gegn Eddu Björk Arnardóttur, en tilraun var gerð til aðfararaðgerðar gegn henni til að fullnusta úrskurði dómstóla um að henni beri að láta af hendi syni sína þrjá, en faðir þeirra í Noregi hefur forræði yfir þeim.

Lögregla handtók Eddu Björk og eiginmann hennar í gærkvöld en þau voru síðan látin laus og aðgerðunum var frestað. Voru synir Eddu Bjarkar ekki fjarlægðir af heimilinu.

Sjá einnig: Eiginmaður Eddu var settur í járn – „Ég hrósa ekki sýslumanni og barnavernd fyrir aðkomu þeirra að málinu“

Í viðtali við DV í morgun sagðist Edda ekki gagnrýna framgöngu lögreglumanna í málinu. Í yfirlýsingu lögreglu segir að lögreglumenn hafi verið á staðnum til að tryggja öryggi fólks á vettvangi. Yfirlýsingin er eftirfarandi:

„Vegna fréttaflutnings af aðgerðum sem Sýslumaðurinn á höfuðborgarsvæðinu stóð að í Grafarvogi í gærkvöld, vill Lögreglan á höfuðborgarsvæðinu árétta að hún var þar til þess að gæta öryggis, eins og venjan er í viðlíka málum. Af þeirri ástæðu fóru fjórir, óeinkennisklæddir lögreglumenn á staðinn til þess að tryggja öryggi fólks á vettvangi, líkt og lög kveða á um.

Þegar hins vegar afgreiðsla málsins dróst á langinn, mannfjölda dreif að og aðstæður breyttust á vettvangi var ákveðið að kalla eftir liðsauka þar sem öryggi fólks á vettvangi þótti ekki lengur tryggt. Lögreglumennirnir, sem fengu það hlutverk, voru einkennisklæddir, en þeir voru á vaktinni við almennt eftirlit annars staðar og brugðust hratt við þegar liðveislu þeirra var óskað í áðurnefndu máli. Hafði þá aðgerðin varað í tæplega tvær klukkustundir.“