Nokkrir einstaklingar hafa fengið skriflega afsökunarbeiðni frá fyrirtækinu Lyfju hf. vegna tilefnislausra uppflettinga á nöfnum þeirra í lyfjagátt. Morgunblaðið greinir frá þessu í morgun en í frétt miðilsins kemur fram að blaðið hafi nokkrar slíkar afsökunarbeiðnir undir höndum. Sigríður Margrét Oddsdóttir, fráfarandi forstjóri Lyfju og verðandi framkvæmdastjóri Samtaka atvinnulífsins, skrifar undir þau bréf sem Morgunblaðið hefur aðgang að.

Um er að ræða, í mörgum tilvikum, þjóðþekkta einstaklinga en flestar uppflettingarnar áttu sér stað árið 2021 en greint hefur verið frá því að Lyfja hafi tilkynnt málið til lögreglu auk þess sem að það hafi komið inn á borð Persónuverndar, Embætti landlæknis og Lyfjastofnunnar .

Morgunblaðið hafði fjallað nokkuð ítarlega um málið sem er enn til rannsóknar hjá lögreglu. Segja má þó að málið hafi fyrst vakið almennilega athygli þegar Stefán Einar Stefánsson, fyrrum fréttastjóri viðskiptadeildar Morgunblaðsins, fullyrti  í hlaðvarpinu Þjóðmálum, í umsjón Gísla Freys Valdórssonar, að Vítalía Lazareva væri sá fyrrum starfsmaður Lyfju sem rannsókn lögreglu beindist að.

„Ég hef persónulegar heimildir fyrir því að þetta mál tengist öðru stóru hápólitísku risa skandalsmáli á Íslandi og að þarna eigi í hlut starfsmaður Lyfju sem heitir Vítalía Lazareva og hún hafi verið þarna að valsa um þessi gögn og leita að upplýsingum um menn sem hún taldi sig eiga eitthvað sökótt við,“ sagði Stefán Einar og fullyrti að uppflettingarnar hafi beinst gegn þremenningunum sem Vítalía sakaði um um að hafa brotið gegn sér, þeim Hreggviði Jónssyn, Ara Edwald og Þórði Má Jóhannessyni.

Uppflettingar hennar hafi þó beinst gegn fleiri einstaklingum, þar á meðal þingmönnum.

Vítalía hefur ekki tjáð sig um málið hingað til.