Óhætt er að fullyrða að Bretar séu slegnir út af máli Lucy Letby, hjúkrunarfræðingi á vökudeild Chester-spítala, sem í vikunni var sakfelld fyrir að hafa myrt sjö nýbura á spítalnum, þar af fimm drengi og tvær stúlkur, og gert tilraunir til að myrða sex börn í viðbót. Lucy er grunuð um miklu fleiri morð og morðtilraunir, en ofannefndir glæpir þóttu fullsannaðir.
Morðin voru framin á eins árs tímabili, frá því í júní 2015 til júní 2016 þegar Lucy var um 26 ára gömul. Hún myrti börn sem lágu á fyrirburadeild með hinum ýmsu aðferðum. Meðal annars sprautaði hún lofti, insúlíni og mjólk í börnin. Hún gerði margar til raunir til að myrða sum börnin áður en henni tókst það og sumar morðtilraunirnar misheppnuðust.
Því hefur nú verið haldið fram að Lucy hafi myrt börnin af því að hún var með þráhyggju fyrir giftum lækni á spítalanum og vissi það að hann yrði einn af þeim sem yrði kallaður út til þess að reyna að bjarga börnunum.
Við réttarhöldin kom fram að Lucy hafði tekist ætlunarverk sitt að nálgast lækninn og hafði tekist með þeim góð vinátta. Meðal annars á læknirinn að hafa heimsótt hana á heimili hennar, gefið henni súkkulaði og meðal annars rætt um að fara í frí með henni utan spítalans.
Umræddur læknir var síðan einn þeirra sem var kvaddur til að bera vitni gegn hinum miskunnarlausa raðmorðingja og er hermt að Lucy hafi fengið taugaáfall í réttarsalnum þegar það hafi orðið ljóst.
Við rannsókn málsins fundust meðal annars handskrifuð bréf á heimili Lucy þar sem hún tjáði lækninum ást sína.
Allar líkur eru taldar á því að Lucy Letby verði dæmd í lífstíðarfangelsi fyrir glæpi sína en dómur verður kveðinn upp á morgun, mánudag. Hávær krafa er um að yfirmenn hennar á spítalanum verði einnig sóttir til saka fyrir að halda verndarhendi yfir morðingjanum og tefja rannsókn þess þegar grunnsemdir fóru fyrst að kvikna um aðkomu hennar að ungbarnadauðanum.
