Ragnar Þór Ingólfsson, formaður VR, segir í samtali við Ólaf Arnarson í hlaðvarpi Markaðarins á Eyjunni að hann sjái ekki hvernig núverandi stjórnvöld geti komið að lausn komandi kjarasamninga. Ekkert traust ríki milli aðila vinnumarkaðarins og ríkisstjórnarinnar, sem svikið hafi öll gefin loforð sem hún gaf í tengslum við lífskjarasamningana.

Markaðurinn - Ragnar Þór Ingólfsson - Klippa 8

„Ég sé ekki hvernig stjórnvöld geta komið að lausn kjarasamninganna öðru vísi en að fyrst verði kosið til Alþingis,“ segir Ragnar Þór.

Hann segir verkalýðshreyfinguna stefna að því að fara sameiginlega sem heildarhreyfing inn í þessar viðræður. „Ef við ætlum að sækja allt á atvinnulífið, hærri vexti, hærri húsaleigu, hærra vöruverð, þá stefnir í mikið óefni,“ segir Ragnar Þór, sem segir lausn kjarasamninga munu byggjast á innkomu stjórnvalda með aðgerðir sem draga úr þörf á kauphækkunum.

Vandamálið sé hins vegar að það ríki einfaldlega ekki traust milli aðila og stjórnvalda vegna svikaferils ríkisstjórnarinnar gagnvart aðilum vinnumarkaðarins.

Markaðurinn - Ragnar Þór Ingólfsson - Klippa 9

Ragnar Þór telur að vanefndir gagnvart verkalýðshreyfingunni verði ríkisstjórninni endanlega að falli í vetur – hún geti hreinlega ekki komið að lausn kjarasamninga og það verði að boða til kosninga áður en stjórnvöld geti stuðlað að farsælli lausn kjarasamninga.