Dagur B. Eggertsson borgarstjóri reyndi fyrir sér á öðrum vettvangi í dag og vann við sorphirðu í Árbænum. Í færslu á Facebook segir Dagur frá því að hann hafi sótt um starfið á sínum tíma, en ekki verið ráðinn:

„Þegar ég komst ekki inn í MH á sínum tíma þá sótti ég um hjá Sorphirðu Reykjavíkur. Og vildi vera í Árbæjargenginu. Ég fékk ekki vinnuna,“ segir Dagur, sem bætti úr í dag þegar hann heimsótti sorphirðuna.

„Úr þessu var sannarlega bætt í morgun þegar ég heimsótti sorphirðuna þar sem flokkarnir voru saman komnir á Stórhöfðanum – tókum gott spjall um hvernig gengi – og ég fékk svo að fara með að hirða í Árbænum!“

Vel var tekið á móti nýja starfsmanninum. „Ágúst Böðvarsson og gengið hans var frábært og tók vel á móti viðvaningnum. Fyrir tilviljun þá byrjuðum við í stigaganginum þar sem ég ólst upp, Hraunbæ 100. Þetta er ekki auðveld vinna og ég skil betur af hverju æskuhetjurnar mínar í öskunni voru berar að ofan á sumrin. En þetta var mjög skemmtilegur morgun og áhugaverður og gaf innsýn í hinar miklu breytingar sem flokkun og sorphirða í borginni er að ganga í gegnum,“ segir Dagur.

Minnir hann á að allir þurfi að leggja sitt af mörkum. „Þar þurfum við borgarbúar öll að taka þátt og starfsfólk sorphirðunar lætur sannarlega ekki sótt eftir liggja, þrátt fyrir einhverja byrjunarörðugleika. Takk innilega fyrir mig – og góðar móttökur!“