Utanríkisráðuneytið segir frá því á Facebook-síðu sinni að við tiltekt í sendiráði Íslands í Japan hafi fundist útrunnið og gatað „vegabréf útlendings“ í nafni Roberts nokkurs James Fischer. Þarna var um að ræða vegabréf fyrrum skáksnillingsins Bobby Fischer sem gefið var út í febrúar 2005 til að koma honum til Íslands, þar sem hann fékk síðar íslenskt ríkisfang eins og margir muna. Í þessu vegabréfi var hann skráður „ríkisfangslaus“.

Sendiherra Íslands í Japan, Stefáni Hauki Jóhannssyni, datt strax í hug að koma vegabréfinu til Fischersetursins á Selfossi en hann hafði einmitt fyrir skemmstu verið að aðstoða Setrið við að komast í samband við ekkju Fischers sem er frá Japan og býr þar.

Leitað var til laga- og stjórnsýsluskrifstofu utanríkisráðuneytisins til að kanna hvort og hvernig hægt væri að láta vegabréf látins einstaklings þriðja aðila eins og setrinu í té. Þá kom í ljós að annað vegabréf hafði nýverið fundist á prótókollskrifstofu ráðuneytisins en það var almennt vegabréf fyrir íslenska ríkisborgara, útgefið í mars 2005, fyrir Robert James Fischer. Í því vegabréfi er hann skráður íslenskur. Þetta var vegabréfið sem hann fékk eftir að hann öðlaðist íslenskan ríkisborgararétt og um leið og hann fékk það var áðurnefnt „vegabréf útlendings“ gatað og ógilt.

Komist var að þeirri niðurstöðu að utanríkisráðuneytið myndi afhenda Fischersetrinu þessi tvö útrunnu vegabréf sem gefin voru út í nafni Robert James Fischer, kt. 090343-2039, til ótímabundinnar vörslu og sýningar, með þeim fyrirvara að ráðuneytið getur fengið það aftur til ef þörf krefur.

Svo skemmtilega vildi til að Stefán Haukur Jóhannsson sendiherra var staddur á landinu þegar niðurstaðan lá fyrir. Mælti hann sér mót við Aldísi Sigfúsdóttur í Fischersetrinu og afhenti henni þessi tvö vegabréf hins umdeilda skákmeistara Bobby Fischer.