Heldur dró úr skjálftavirkni á Reykjanesskaga í nótt, þrátt fyrir að 750 skjálftar hafi mælst frá miðnætti. Í nótt, aðfararnótt 6. júlí, urðu 15 skjálftar yfir 3,0 að stærð, sá stærsti klukkan 1.12 að stærð 3,8. Búast má við áframhaldandi skjálftavirkni, en eins og komið hefur fram í fréttum telja jarðfræðingar telja vaxandi líkur á eldgosi.
Mynd: Skjáskot vedur.is
Frá því að jarðskjálftahrinan hófst, 4. júlí, hafa um 4000 jarðskjálftar mælst á svæðinu milli Fagradalsfjalls og Keilis. Stærsti skjálftinn varð í gærmorgun kl. 8:21 og mældist 4,8 að stærð, eins og segir á vedur.is. Síðustu tvo sólarhringa hafa alls 3258 skjálftar riðið yfir landið allt.
Alls hafa 13 skjálftar yfir fjórum að stærð mælst frá því hrinan hófst og tugir yfir þremur að stærð. Stærstu skjálftarnir finnast víða á SV-landi, austur að Hellu og norður á Snæfellsnes. Búast má við áframhaldandi skjálftavirkni. Hrinan nú er talin vera vegna nýs kvikuinnskots á milli Fagradalsfjalls og Keilis.
Hægt er að fylgjast með Fagradalsfjalli í beinu streymi á tveimur vefmyndavélum RÚV.
