Íþróttavikan er komin á fulla ferð á 433.is og í Sjónvarpi Símans. Helgi Fannar Sigurðsson og Hrafnkell Freyr Ágústsson sjá um þáttinn og fá þeir til sín góða gesti alla föstudaga. Í þetta skiptið voru þeir Andri Geir Gunnarsson og Vilhjálmur Freyr Hallsson úr hlaðvarpinu Steve Dagskrá gestir.

Gylfi Þór Sigurðsson hefur verið áberandi leikjum í úrslitaeinvígi Subway deildar karla á milli Vals og Tindastóls. Þar fylgist hann grannt með.

Um mánuður er síðan Gylfi varð laus allra mála. Í kjölfarið kom hann aftur heim til Íslands.

Það er ekki vitað hvort hann taki knattspyrniskóna fram á ný, en kappinn hefur ekki spilað fótbolta síðan vorið 2021 með Everton.

Lítið hefur hins vegar heyrst af því hvort Gylfi ætli aftur á völlinn. Helgi velti því upp í þættinum hvort það væri vísbending um að skórnir væru komnir upp í hillu.

„Ég er farinn að hallast að því að það gerist (að hann setji skóna upp í hillu). Það er bara tilfinning samt og ég hef ekkert fyrir mér í því,“ svaraði Hrafnkell.

Vilhjálmur var á öðru máli. „Ég held að hann komi aftur. Ég held að þetta sé frekar tímapunkturinn núna, það er erfitt að komast inn núna einhvers staðar.“

Andri sagði að gamla lið Gylfa hér á landi, FH, muni reyna að fá hann til liðs við sig.

„FH-ingar munu reyna. Þetta verður nefnt,“ sagði hann og Vilhjálmur tók undir. Sjálfur segist Andri þó hallast að því að Gylfi sé hættur í fótbolta.

Umræðan í heild er hér að neðan.