Arnar Þór Viðarsson var látinn fara sem þjálfari íslenska karlalandsliðsins fyrr í dag. 433.is tók saman sex nöfn sem gætu verið á blaði KSÍ hvað varðar hugsanlegan arftaka hans.

Íslenska landsliðið vann á dögunum sinn stærsta sigur í sögunni, 7-0 gegn Liechtenstein. Nokkrum dögum áður hafði liðið tapað 3-0 gegn Bosníu-Hersegóvínu. Þar var frammistaðan ekki upp á marga fiska en þó vantaði tvo lykilmenn.

Um fyrstu tvo leikina í undankeppni EM 2024 var að ræða. Nýr landsliðsþjálfari mun því stýra Strákunum okkar í síðustu átta leikjum keppninnar. Í júní mætir Ísland Slóvakíu og Portúgal.

Hér að neðan má sjá lista yfir þá sem gætu tekið við.

Arnar Gunnlaugsson
Einn allra fremsti þjálfari sem við Íslendingar eigum og því getur ekki annað verið en að hann sé á blaði. Arnar hefur náð frábærum árangri með Víking R. en það er ljóst að uppleggið með íslenska landsliðið þyrfti að vera nokkuð frábrugið því sem hann er vanur þar.

Arnar Grétarsson
Er nýtekinn við Val og ekki víst að hann yfirgefi það verkefni strax. Hann er hins vegar stórkostlegur þjálfari þegar kemur að varnarleik, eitthvað sem íslenska landsliðið virðist þurfa á að halda.

Freyr Alexandersson 
Freyr hefur sannað sig. Hann þekkir landsliðsumhverfið hér heima út og inn eftir að hafa verið aðstoðarþjálfari karlalandsliðsins. Freyr er með stórt starf en hann er þjálfari Lyngby í dönsku úrvalsdeildinni.

Lars Lagerback 
Það þarf ekki að útskýra þetta frekar. Lars náði besta árangri í Íslandssögunni. Hann er á lausu og gæti Vanda tekið upp tólið.

Rúnar Kristinsson
Hefur lengi verið einn fremsti þjálfarinn hér heima og gæti verið kominn tími á að hann fái kallið frá landsliðinu.

Åge Fridtjof Hareide
Margreyndur þjálfari sem myndi eflaust henta Íslandi vel. Hefur margra ára reynslu úr landsliðsbolta, þar sem hann stýrði norska og danska landsliðinu. Er sem stendur bráðabirgðaþjálfari hjá Malmö.