Helgi Fannar skrifar frá Zenica í Bosníu

Jón Dagur Þorsteinsson, kantmaður íslenska landsliðsins segir mörkin sem liðið fékk á sig snemma leiks í 3-0 tapi gegn Bosníu í undankeppni EM 2024 í kvöld hafa haft of mikil áhrif á liðið. Svekkelsið sé vissulega til staðar eftir svona leik en það sé nóg eftir.

„Mér fannst við eiga erfiða byrjun og aldrei ná okkur upp eftir það,“ sagði Jón Dagur við íslensku fjölmiðlasveitina eftir leik. „Þetta var mjög þungt og við áttum ekki okkar besta leik.“

Hann segir mörkin sem íslenska liðið fékk á sig hafa haft of mikil áhrif á liðið.

„Við náðum ekki fram okkar besta leik eftir þau. Náðum ekki alveg að finna lausnir á því hversu þéttir þeir voru til baka. Við lokuðum ákveðnum svæðum í seinni hálfleik og mér fannst við gera það ágætlega en eftir þriðja markið var þetta bara game over.“

Er þetta munurinn á liðunum?

„Nei ég myndi ekki segja það, mér fannst þetta ekki vera 3-0 leikur. Þetta var sérstakur leikur en það er erfitt að segja að þetta sé ekki munurinn á þessum liðum, þetta var munurinn í kvöld en við munum sýna það í seinni leiknum gegn þeim að við eigum fullan séns í þá.“

Verður erfitt að komast yfir þetta tap?

„Nei þetta er fyrsti leikurinn í undankeppninni, þetta er ekki búið. Þetta er jafn riðill sem við erum í og það er bara áfram gakk, ekkert annað í stöðunni. Þetta er búið.“