Samkvæmt niðurstöðum nýrrar rannsóknar þá getur mikið magn koffíns í blóðinu dregið úr magni líkamsfitu og dregið úr líkunum á að fá sykursýki 2. Þessi niðurstaða gæti orðið til þess að hitaeiningasnauðir koffíndrykkir verði notaðir í baráttunni gegn offitu og sykursýki 2. En það er þörf á frekari rannsóknum.

Þetta kemur fram í BMJ vísindaritinu. The Guardian hefur eftir Dr Katarina Kos, sérfræðingi í sykursýki og offitu við University of Exeter, að rannsóknin sýni hugsanlegan heilsufarsávinning fólks, með mikið koffínmagn í blóðinu. Hún tók fram að rannsóknin hafi ekki beinst að áhrifum meiri kaffidrykkju og ráðleggi fólki ekki að drekka meira kaffi.

Hún benti á að koffíndrykkir, sem innihalda sykur og fitu, geri jákvæðu áhrifin að engu.

Rannsóknin byggðist á fyrri rannsókn þar sem komist var að þeirri niðurstöðu að það að drekka þrjá til fimm kaffibolla á dag, sem innihéldu að meðaltali 70 til 150 milligrömm af koffíni, drægi úr líkunum á sykursýki 2 og hjarta- og æðasjúkdómum.