Kári Stefánsson taugalæknir og forstjóri Íslenskrar erfðagreiningar er gestur helgarspjalls Rauða borðsins í dag. Í viðtalinu segir Kári frá sjálfum sér, uppvextinum og hvers vegna hann er svona skrítinn og hefur alltaf verið, um örlög og möguleikana að komast undan þeim, um sósíalisma, ójöfnuð og verkalýðsbaráttu Sólveigar Önnu.

„Ég lít á mig sem sósíalista vegna þess hvernig ég horfi á heiminn og hvað mér finnst réttlæti og hvað óréttlæti. Skólakerfið þarf að veita öllum börnum svipuð tækifæri og það þarf að gera með því að forgangsraða grunnskólum ofar háskólunum. Ég held við ættum að leggja gífurlega áherslu á að fjármagna grunnskólanna, við eigum að sjá til þess að heilbrigðiskerfið sé ókeypis. Það er alveg fáránlegt að menn leggist inn á spítala til að fara í aðgerð og það setji þá næstum því á hausinn, að fólk velti því fyrir sér hvort það hafi efni á að fara í apótek til að sækja lyfin sín, það er alveg út í hött,“ segir Kári, sem fer vítt og breitt í samtalinu.

Aðspurður segir Kári mikilvægt að fólk eigi greiðan aðgang að húsnæði. „Það verða allir að hafa einhvers konar hreysi til að búa í.“

Segir Kári að gæta verði þess að launamunur sé ekki gígantískur og verðmætasköpun hlaðist á fáar hendur. Segist Kári vera auðugur maður. Segir hann hætt við því að auðugir menn eigi ekki ferðafélaga meðal þeirra sem reiða sig á samfélagið.

„Það eru dapurleg örlög að vissu leyti. Annars skiptist auður þessa samfélags í tvo hópa, fólk sem hefur tilfinningar til þessa samfélags og vilja leggja sitt af mörkum til þess, og hina sem gera það ekki.“

Aðspurður um hvort Kári geti fundið genið sem veldur því að sumum finnist þeir aldrei fá nóg, segist hann ekki þekkja gögnin sem vísað er til. „Það sem mestu máli skiptir er það sem er innan þessarar höfuðskeljar, það kaupir enginn maður sér hamingju, það kaupir enginn maður sér vellíðan ekki nema skammvinna vellíðan með kókaín og öðrum göfugum lyfjum, en þú færð ekki vellíðan af neinu slíku. “

Hlusta má á viðtalið í heild sinni hér.