Eyjólfur Kristjánsson kom í Íþróttavikuna með Benna Bó sem sýnd er á Hringbraut á föstudagskvöldum. Með honum var Hörður Snævar Jónsson, íþróttafréttastjóri Torgs. Eyfi er mikill stuðningsmaður Manchester United og hefur haldið með liðinu síðan 1968.

Þeir félagar fóru yfir fréttir vikunnar en meðal þess sem bar á góma voru ársreikningar félaganna en þrír hafa birst, hjá KR, Fram og HK og voru félögin öll rekin með tapi. „Félögin vanda sig að fela ársreikninganna skilmerkilega. HK er með tap upp á 16 milljónir, KR 26 milljónir og Fram var með 3,5 milljónir. Þetta virðist vera stefið í Íslenskum fótbolta. Menn eru að taka sénsa og það er spurning hversu lengi reksturinn getur verið sjálfbær,“ sagði Hörður.

Hann benti á að hann hefði heyrt í nokkrum félögum og það er sama stefið. Taprekstur nema kannski hjá Breiðablik og Víking „Blikar fengu mikla Evrópupeninga og selja leikmenn. Þeir hafa verið reknir vel. Svo er auðvitað Valur sem er réttu meginn við núllið með hjálp góðra manna.“

Eyjólfur spurði þá hvort það vantaði ekki fleira fólk á völlinn. „Covid var ekki að hjálpa. Við erum búin að ala fólk upp að það geti horft á leikina í beinni. Hefur ungt fólk þolinmæði að horfa á 90 mínútur af fótbolta. Áskorun íþrótta næstu árin er þessi einbeitingarskortur sem er hjá ungu fólki.“