Tveir leikir fóru fram í fyrri viðureignum 16-liða úrslita Meistaradeildar Evrópu í kvöld. Borussia Dortmund bar sigurorðið gegn Chelsea og þá vann Benfica góðan sigur á Club Brugge á útivelli.

Í Þýskalandi tóku heimamenn í Borussia Dortmund á móti enska úrvalsdeildarfélaginu Chelsea.

Aðeins eitt mark var skorað í leiknum og það kom á 63. mínútu og var þar að verki Karim Adeyemi, leikmaður Dortmund.

Dortmund fer því með eins marks forystu inn í síðari leik liðanna sem leikinn verður á Brúnni í Lundúnum.

Gestirnir höfðu betur í Belgíu 

Í Belgíu tóku heimamenn í Club Brugge á móti portúgalska liðinu Benfica.

Það var Joao Mario, leikmaður Benfica sem kom gestunum yfir og  það með marki úr vítaspyrnu á 51. mínútu leiksins.

Þannig stóðu leikar allt þar til á 88. mínútu þegar að David Neres tvöfaldaði forystu Benfica með marki og reyndist það lokamark leiksins.

Benfica fer því með góðan sigur í farteskinu heim til Portúgal fyrir seinni leik liðanna.