Liverpool og Everton mættust í nágrannaslag í ensku úrvalsdeildinni í kvöld. Leikið var á Anfield.

Það er óhætt að segja að allt annað hafi verið að sjá til Liverpool í kvöld heldur en í flestum leikjum undanfarið.

Heimamenn voru mun betri aðilinn í fyrri hálfleik. Mohamed Salah kom þeim yfir á 36. mínútu eftir skyndisókn. Egyptinn var einn þeirra fjölmörgu leikmanna Liverpool manna sem stigu upp í kvöld eftir dapurt gengi.

Það var skammt liðið á seinni hálfleik þegar Cody Gakpo var réttur maður á réttum stað á fjærstönginni og stýrði fyrirgjöf Trent Alexander-Arnold í netið. Um fyrsta mark Hollendingsins fyrir Liverpool var að ræða. Staðan 2-0.

Liverpool var mun líklegra til að bæta við marki það sem eftir lifði seinni hálfleiks. Lærisveinar Jurgen Klopp létu tvö mörk þó duga.

Úrslitin þýða að Liverpool fer upp fyrir Chelsea og í níunda sæti deildarinnar. Liðið er nú níu stigum frá Meistaradeildarsæti.

Everton er hins vegar í fallsæti, stigi frá öruggu sæti.