UNICEF á Íslandi hóf í dag neyðarsöfnun fyrir Sýrland vegna jarðskjálftanna stóru sem urðu í Tyrklandi og Sýrlandi í nótt.

Ástandið í Sýrlandi var fyrir hamfarirnar afar viðkvæmt og neyð barna þar mikil eftir tæp 12 ár af stríði og hefur UNICEF, Barnahjálp Sameinuðu þjóðanna, verið á vettvangi í landinu frá upphafi stríðsins og allar götur síðan 1970 til að tryggja velferð og réttindi barna þar í landi. UNICEF hefur unnið þrotlaust að því að tryggja sýrlenskum börnum skjól, menntun, næringu og heilbrigðisþjónustu. Kemur þetta fram í tilkynningu frá UNICEF á Íslandi.

Líkt og komið hefur fram er ljóst að mörg hundruð manns hafi látið lífið í jarðskjálftunum sem átti upptök sín nærri Gaziantep við landamæri Sýrlands og Tyrklands en þar heldur m.a. mikill fjöldi flóttafólks frá Sýrlandi til við erfiðar aðstæður. Nú er sömuleiðis hávetur í Sýrlandi og 6,9 milljónir íbúa, þar af 3 milljónir barna, á vergangi eftir að hafa neyðst til að flýja heimili sín á umliðnum árum. Náttúruhamfarir sem þessar, ofan á laskaða innviði og neyð íbúa er því aðeins til að auka þeirra neyð.

UNICEF á Íslandi hefur staðið fyrir neyðarsöfnun fyrir sýrlensk börn um árabil en nú er ljóst að þörfin, sem mikil var fyrir og metin á 328 milljónir dala fyrir árið 2023, mun aukast verulega á næstunni. Áhrif skjálftanna munu koma verst niður á börnum og viðkvæmum hópum í landinu. Þau þurfa nú á okkar stuðningi að halda, sem aldrei fyrr.

Til að leggja neyðarsöfnun UNICEF á Íslandi vegna Sýrlands lið er hægt að:

Senda SMS-ið „STOPP“ í númerið 1900 til að styrkja um 1.900 krónur.

Leggja inn frjáls framlög á reikning 701-26-102040  kennitala: 481203-2950

Frekari styrktarleiðir og upplýsingar má finna á vef unicef.is