Lögreglustjórinn á höfuðborgarsvæðinu hefur vísað frá kæru Íslensku Klíníkurinnar í Búdapest gegn Hörpu Snjólaugu Lúthersdóttur um tilraun til fjárkúgunar.
DV greindi frá málinu í haust. Hörpu og tannlæknastofuna greindi á um tannaðgerðir sem hún gekkst undir en Harpa segist hafa borið verulegan kostnað vegna meintra vanefnda stofunnar.
Í frétt DV lýsti Harpa meintum vanefndum stofunnar en Íslenska Klíníkin staðhæfir að Harpa beri sjálf ábyrgð á því sem aflaga fór, en stofan geti, vegna trúnaðarskyldu, ekki greint nánar frá málavöxtum.
Harpa stofnaði Facebook-síðuna „Íslenska Klíníkin í Búdapest – slæmar reynslusögur“ þar sem hún rakti meðferðarsöguna hjá stofunni og meint ámælisverð vinnubrögð Íslensku Klíníkurinnar.
Harpa og fulltrúi frá stofunni áttu í textaspjalli um hvað gera þyrfti til að Harpa tæki niður síðuna og léti af skrifunum. Á grunni þeirra samskipta var Harpa kærð fyrir tilraun til fjárkúgunar.
Hún komst að því fyrir skömmu að málinu hefði verið vísað frá. Hún segist ekki hafa verið boðuð í viðtal vegna kærunnar en hafi komist að frávísuninni er hún spurðist fyrir um stöðu málsins hjá Lögreglustjóranum á höfuðborgarsvæðinu.
„Ég er rosa ánægð,“ segir Harpa um þessi málalok.
