Í gærkvöldi birtu fjölmiðlar myndbönd af árásinni á Bankastræti Club, um er að ræða upptökur úr eftirlitsmyndavélum á skemmtistaðnum. Myndböndin sem fjölmiðlar birtu komu þó ekki beint úr eftirlitsmyndavélunum heldur er um að ræða myndskeið sem tekið er af myndböndunum þar sem þau voru spiluð af tölvuskjá. Talsverðar líkur eru á að lögreglumaður hafi lekið myndböndunum en í öðru myndbandinu má sjá forrit hvers notkun einskorðast aðallega við lögreglumenn.

Grímur Grímsson, yfirlögregluþjónn hjá miðlægri rannsóknardeild lögreglunnar á höfuðborgarsvæðinu, segir í samtali við DV að lögreglan sé með þetta til skoðunar. „Við höfum fengið þessar upplýsingar og erum að skoða það hvort að það sé. Ég tek undir það, það svona blasir við að miðað við það sem sést á myndbandinu í fjölmiðlum að þá stafi þetta frá lögreglu,“ segir Grímur. „Það verður bara tekið á því með viðeigandi hætti.“

Grímur ítrekar að málið sé til skoðunar, fari það til rannsóknar þá verði það hjá héraðssaksóknara sem fer með rannsóknir á málum þar sem lögreglumaður er grunaður um brot. Hann segir að ef lögreglumaður deildi myndbandinu, eins og virðist vera, þá sé um brot í starfi að ræða.

„Já þetta myndi vera það væntanlega, ef þetta er svona eins og við blasir, þá er það grunur um brot í opinberu starfi.

Sjá einnig: Myndband af árásinni á Bankastræti Club vekur óhug