Þegar verslað er við Louis Vuitton þá er betra að eiga drjúgan skilding inni á reikningnum sínum því vörur fyrirtækisins eru ekki þær ódýrustu á markaðnum. En nýlega snerist dæmið við þegar Benoit-Louis Vuitton, erfingi tískuhússins, varð fyrir því að brotist var inn í íbúð hans í París og miklum verðmætum stolið.

Samtals var verðmæti þýfisins um 100.000 evrur en það svarar til um 15 milljóna íslenskra króna. France24 skýrir frá þessu.

Þjófurinn eða þjófarnir höfðu úr, skartgripi og töskur á brott með sér. Þarna missti Vuitton því muni frá sér án þess að fá greitt fyrir þá.

Sérstök deild lögreglunnar, sem annast rannsókn á málum tengdum glæpagengjum, rannsakar málið en innbrotið átti sér stað aðfaranótt mánudags. Benoit-Louis Vuitton var að heiman þegar þetta gerðist, var staddur í New York.