Framtíð David De Gea hjá Manchester United er í óvissu og skoðar félagið hvað eigi að gera að markvarðamálum til framtíðar.
Samningur hins 31 árs gamla De Gea við United rennur út næsta sumar og er ekki víst að hann framlengi.
Á dögunum var Jan Oblak orðaður við United, en samningur hans við Atletico Madrid rennur sömuleiðis út næsta sumar. Það gæti því án efa reynst freistandi fyrir enska félagið að reyna að krækja í hann frítt.
Nú segir Football Insider hins vegar frá því að United hafi áhuga á argentíska markverðinum Emiliano Martinez hjá Aston Villa.
Martinez var um árabil hjá Arsenal en fór til Villa árið 2020, þar sem hann hefur orðið fastamaður.
Samningur Martinez við Villa rennur þó ekki út fyrr en 2027 og þarf United því líklega að borga nokkuð vel, ætli félagið sér að fá hann.
