Ólafur Kristjánsson, yfirmaður knattspyrnumála hjá Breiðablik, settist í settið í Íþróttavikunni með Benna Bó sem sýnd er á föstudögum á Hringbraut. Hann sat þar með Herði Snævari Jónssyni, íþróttastjóra Torgs.

Umræðan um Þjóðarhöll fyrir íslensk landslið var hávær í vikunni. Var hún að sjálfsögðu tekin fyrir í þættinum.

„Þetta er leiðindamál í alla staði, menn eru að slá sér til riddara þegar það þarf að sækja atkvæði og vinsældir. Lofa því að það verði sett eitthvað í gang, það er svo sett í nefnd sem setur það í aðra nefnd. Nú veit ég ekki hvort nefndin hafi hist eða ekki, þetta er orðið langþreytt ástand og er í raun algjört virðingarleysi að það sé ekkert gert,“ segir Ólafur í þættinum, en bæði ríkisstjórn og borgaryfirvöld hafa lofað nýrri höll.

Hávær köll hafa verið eftir nýjum þjóðarleikvangi í knattspyrnu og nýrri þjóðarhöll fyrir innanhúsíþróttir lengi. Viljayfirlýsing var undirrituð í maí síðastliðnum um byggingu þjóðarhallar en ekki eru allir bjartsýnir á að hún sé á leiðinni.

„Við erum með vonda aðstöðu, í raun enga aðstöðu. Það er verið að reyna einkaframkvæmdir í ýmsum geirum samfélagsins sem er stundum umdeilt. Ég held að það sé útséð með það að ríkið eða sveitarfélög komi að þessu. Þar draga menn bara lappirnar og það þarf að finna lausn þar sem fjármagnið kemur annars staðar frá. Það virðist enginn áhugi þegar á hólminn er komið að setja raunverulega peninga í verkefnið,“ segir Ólafur.

Ólafur segir auðvelt fyrir stjórnvöld að lofa hinu og þessu en erfiðara sé að standa við gefin loforð.

„Það hangir á sömu spýtunni, þetta er marg tuggið. Á tyllidögum vilja allir upp á hestinn og taka þátt, þegar kemur að því að standa við gefin loforð þá verða menn litlir í sér. Það er fullt af hlutum og málum sem myndu vera brýnni en þjóðarhöll í stóra samhenginu en þetta er eitthvað sem þarf virkilega að fara að gera gangskör í. Ég held að margir átti sig ekki á því hversu aftarlega á merinni við erum þegar kemur að aðstöðu.“