Vladímír Pútín, Rússlandsforseti, reiknaði ekki með að stríðið í Úkraínu myndi vara í rúmlega hálft ár. Þetta er mat Eirik Kristoffersen, æðsta yfirmanns norska hersins. Hann segir að eitt sé það sem Pútín hafi svo sannarlega vanmetið.

„Ég held að forsetinn og nánasta samstarfsfólk hans hafi vanmetið samstöðu Vesturlanda,“ sagði hann í samtali við Dagbladet.

Í kjölfar innrásarinnar hafa Vesturlönd beitt Rússa efnahagslegum refsiaðgerðum, sett háttsetta stjórnmála- og embættismenn í ferðabann og nú síðast ákvað ESB að gera Rússum erfiðara fyrir við að fá vegabréfsáritun til aðildarríkja sambandsins. Þess utan hefur verið gripið til fleiri aðgerða gegn Rússum sem standa nú að stórum hluta einangraði á alþjóðavettvangi.

Kristoffersen sagði að það sé eitt í tengslum við stríðið sem valdi honum áhyggjum. Það er sú athygli sem stríðið fær í fjölmiðlum og meðal almennings utan Rússlands.

Hann telur að fjölmiðlar og almenningur verði að gæta þess að halda athyglinni á því sem er að gerast í Úkraínu þrátt fyrir að stríðið dragist á langinn og ekki sé að sjá að því ljúki á næstunni.