Eden Hazard, leikmaður Real Madrid, vildi ekki tjá sig mikið um möguleg skipti í bandarísku MLS-deildina er hann ræddi við ESPN um framtíðina.
Hazard er alveg ákveðinn í því að sanna sig næsta vetur en hann hefur upplifað þrjú erfið ár hjá Real eftir mjög góða tíma hjá Chelsea á Englandi.
Meiðsli hafa spilað stórt hlutverk hjá Hazard á Spáni en hann hefur einnig verið ásakaður um að sýna lítinn metnað í spænsku höfuðborginni.
Lið í MLS-deildinni eru að fylgjast með gangi mála og vonast til að fá Hazard í sínar raðir ef hann ákveður að yfirgefa Real.
,,Ég er ekki að hugsa of mikið um það, ég er einbeittur að þessu verkefni,“ sagði Hazard við ESPN.
,,Þetta hafa verið þrjú erfið ár fyrir mig svo ég er bara einbeittur að þessu tímabili. Ég er enn samningsbundinn til tveggja ára og svo sjáum við til. Eftir tvö ár verð ég 33 ára gamall og við sjáum hvað gerist.“
,,Ég vil sýna fólki að ég get spilað fyrir þetta félag. Ég hef ekki spilað mikið undanfarint tímabil svo ég vil bara ná að sýna mitt besta, það er það eina sem ég vil“
