Samningur Fabian Delph við Everton er að renna út og er nokkuð ljóst að hann mun ekki skrifa undir nýjan.
Delph hefur nefnilega eytt öllu sem tengist Everton af samfélagsmiðlum sínum. Stuðningsmenn hafa látið óánægju sína í ljós vegna þessa.
Þetta er ekki í fyrsta sinn sem Delph yfirgefur félag og skilur stuðningsmenn þess bálreiða eftir. Það var einnig uppi á teningnum eftir að hann fór frá Aston Villa til Manchester City árið 2015.
Það er ekki ljóst hvert næsta skref Delph verður á ferlinum.
Auk Villa og City hefur hann leikið með Leeds á meistaraflokksferli sínum.
Delph var enskur landsliðsmaður á árunum 2014 til 2019. Hann lék alls tuttugu leiki á þessum fimm árum.
