Arsenal hefur staðfest að Per Mertesacker muni láta af störfum hjá félaginu í sumar. Þjóðverjinn, sem lék 221 leik fyrir Arsenal á árunum 2011–2018, hefur verið yfirmaður akademíunnar síðan hann lagði skóna á hilluna, en mun nú hverfa frá félaginu í lok tímabils.

Mertesacker tók við starfinu árið 2018 og hefur haft yfirumsjón með uppbyggingu yngri flokka Arsenal, þar sem áhersla hefur verið lögð á að þróa unga leikmenn og undirbúa þá fyrir knattspyrnu á hæsta stigi. Undir hans stjórn hafa fjölmargir leikmenn fengið tækifæri með aðalliðinu.

„Arsenal er og verður alltaf mjög sérstakur klúbbur fyrir mig, þannig að þetta var erfið ákvörðun. Ég er afar þakklátur fyrir það traust sem mér var sýnt þegar ég fór beint úr því að vera leikmaður í að taka við sem yfirmaður akademíunnar. Nú er kominn tími til að halda áfram, prófa eitthvað nýtt og reyna enn frekar á sjálfan mig,“ er haft eftir Mertesacker í tilkynningu félagsins.

Hann segist ætla að einbeita sér að því að ljúka tímabilinu af fullum krafti og tryggja eftirmanni sínum góðan grundvöll til að halda góðu starfi áfram.